Vinir sundurorða vegna Gibsons

Slest hefur upp á vinskap leikaranna Robert Downey Jr. og Jude Law en þeir urðu miklir mátar við tökur á kvikmyndinni Sherlock Holmes. Ástæða ósættisins mun vera vinátta Downey Jr. við leikarann Mel Gibson.

Robert Downey Jr. hefur verið náinn vinur Gibsons í mörg ár og mun sá síðarnefndi hafa staðið þétt við bakið á Downey Jr. þegar hann átti við áfengisvanda að stríða. Downey Jr. hefur launað vini sínum greiðann með því að styðja hann í gegnum skilnað hans við rússnesku tónlistarkonuna Oksönu.

„Jude finnst hegðun Mels vera óviðunandi og honum finnst ekki að fólk eigi að styðja við bakið á manni sem hagar sér eins og Mel hefur gert. Jude finnst sem Mel hafi fengið næg tækifæri til að bæta sig og það pirrar hann að Robert skuli halda vináttunni við svona mann,“ var haft eftir heimildarmanni. Law og Downey Jr. vinna nú saman að Sherlock Holmes 2 og er stirt á milli þeirra á tökustað.

„Þeir voru mjög góðir vinir en nú talast þeir varla við á milli taka.“