Leggur stuðsamning fyrir bæjarstjórn

„Hugmyndin er að ef við náum ekki að redda nógu mörgum styrkjum sé bærinn tilbúinn til að hlaupa undir bagga með eitthvað," segir tónlistarmaðurinn Örn Elías Guðmundsson, oftast kallaður Mugison.

Óvissa hefur ríkt um framtíð tónlistar­hátíðarinnar Aldrei fór ég suður, sem hefur verið haldin á Ísafirði um páskana síðustu ár. Mugison og félagar lögðu sérstakan stuðsamning fyrir bæjarstjórn á föstudag, en í honum felst meðal annars að Ísafjarðarbær styrki hátíðina á hverju ári.

„Hluti af þreytunni í mannskapnum snýst um að við erum alltaf á byrjunarreit á hverju ári með fjármögnun," segir hann. „Krónutalan þarf ekki að vera há, þetta er allt gert í sjálfboðavinnu. Þetta er aðallega stuðsamningur því við viljum fá Vestfirðinga inn í þetta."

Mugison telur þó að bærinn sé til að skoða málið helvíti vel. „Þetta er goðsagnakenndur samningur," segir hann. „Ég setti inn í fyrstu grein að bæjarstjóri og bæjarfulltrúar eigi að vera í bullandi, sullandi stuði alla páskana. Enn fremur eigi þeir að gera allt til að smita aðra bæjarbúa af gleði sinni og ást."

Með þessu vill Mugison virkja bæjarstjórn til þátttöku í hátíðinni. „Ég vil fá bæjarráðið og bæjarstjóra til að taka að sér hópastjórn, elda morgunmat ofan í poppara og jafnvel ættleiða þá þannig að dvöl þeirra verði algert himnaríki. Þetta fólk er náttúrlega að gefa vinnu sína og tíma."

Mugison segist hafa fengið jákvæð viðbrögð við stuðsamningnum, þótt engin svör hafi borist. „Ég hef ekki heyrt neitt," segir hann. „Ég fékk reyndar einn tölvupóst og í honum stóð „allir í stuði". Það er mjög jákvætt."

Ekki náðist í Daníel Jakobsson, bæjarstjóra Ísafjarðarbæjar, við vinnslu fréttarinnar. - afb