Bluth-fjölskyldan kemur saman

Leikarateymið úr gamanþáttunum sálugu Arrested Development kemur saman á ný á New Yorker-hátíðinni 2. október. Eins og nafn hátíðarinnar gefur til kynna fer hún fram í New York, en á meðal annarra gesta eru Owen Wilson, hljómsveitin Scissor Sisters og spéfuglinn Zack Galifianakis.

Viðburðurinn kallast A Bluth Family Reunion, eða endurfundir Bluth-fjölskyldunnar. Munu leikararnir Jason Bateman, Portia de Rossi, Will Arnett, Michael Cera, David Cross, Tony Hale, Alia Shawkat, Jeffrey Tambor og Jessica Walter sitja fyrir svörum ásamt manninum á bak við þættina, Mitchell Hurwitz.

Arrested Development er að margra mati einir bestu gamanþættir sem sýndir hafa verið í sjónvarpi. Þrátt fyrir það voru aðeins tvær og hálf þáttaröð framleidd, áður en framleiðslu var hætt vegna þess að áhorfið var ekki upp á marga fiska. Miklar vangaveltur hafa verið um væntanlega kvikmynd sem myndi reka smiðshöggið á sögu Bluth-fjölskyldunnar og samkvæmt nýjustu fréttum hefjast tökur á næsta ári.