Lífið

Bob Dylan heiðraður í Hörpu

Óttar Felix Hauksson hefur verið aðdáandi Bobs Dylan síðan um miðjan sjöunda áratuginn. fréttablaðið/gva
Óttar Felix Hauksson hefur verið aðdáandi Bobs Dylan síðan um miðjan sjöunda áratuginn. fréttablaðið/gva
„Það verður haldið upp á sjötugsafmæli meistarans með myndarbrag,“ segir Óttar Felix Hauksson, útgefandi og tónlistarmaður.

Óttar Felix hefur bókað Hörpuna 24. maí í tilefni af sjötugsafmæli Bobs Dylan. Þar munu margir af fremstu tónlistarmönnum landsins koma fram og heiðra þennan merka tónlistarmann. Dylan-mafían á Íslandi, aðdáendaklúbbur meistarans, kemur einnig að verkefninu ásamt Rás 2, sem mun líklega halda Dylan-dag í tilefni afmælisins. „Ég kem þessu á koppinn í samvinnu við þá og Ríkisútvarpið,“ segir Óttar og lofar skemmtilegum tónleikum. „Þetta verður gaman. Þetta er nýtt hús með flottu hljóðkerfi og ljósakerfi og þarna kemur fram úrvalslið þeirra bestu.“ Ísland er ekki eina landið sem ætlar að heiðra Dylan á árinu því aðdáendaklúbbar hans víða um heim eru að skipuleggja svipaða tónleika.

Óttar segir að kominn hafi verið tími á Dylan-heiðurstónleika hér á landi, sérstaklega í ljósi þess að Stones, Bítlunum og John Lennon hefur áður verið gert hátt undir höfði. „Það hefur líklega enginn haft dýpri áhrif á dægurlagamenninguna. Dylan hefur skipað stóran sess hjá mér alla tíð, alveg síðan um miðjan sjöunda áratuginn,“ greinir Óttar frá.

Fyrsta platan sem hann eignaðist var einmitt með Dylan árið 1964. „Ég sá hann 1974 ásamt The Band úti í Washington DC. Þá var hann algjörlega á toppnum en þetta var fyrsti túrinn hans í átta ár eftir mótorhjólaslysið fræga,“ segir Óttar, sem hefur einnig séð Dylan tvívegis hér á landi, síðast árið 2008. - fb





Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.