Skemmtikvöld fyrir konur og karla

Ný fatalína Herrafataverzlunar Kormáks & Skjaldar verður frumsýnd í Þjóðleikhúskjallaranum á morgun, miðvikudag. Línan er hönnuð af Guðmundi Jörundssyni, yfirhönnuði verslunarinnar.

Línan er óbeint framhald þeirrar er frumsýnd var í fyrra en inniheldur þó ný snið og önnur efni. „Efnin eru aðeins dempaðri og sniðin svolítið flippaðri en báðar innihalda línurnar buxur, vesti og jakka,“ útskýrir Guðmundur.

Herrafatasýningin er að sögn Guðmundar með öðru sniði en venjuleg tískusýning því um eiginlegt skemmtikvöld er að ræða þar sem skemmtikraftar troða upp á milli fatasýninganna.

„Fyrirsæturnar koma inn alls fimm sinnum yfir kvöldið og er tískusýningin brotin upp með ýmsum skemmtiatriðum þess á milli. Í fyrra kom Helgi Björnsson fram bæði sem fyrirsæta og skemmtikraftur og það sama verður upp á teningnum í ár, nema nafn poppstjörnunnar er enn hernaðarleyndarmál. Ég vil líka taka fram að þetta er ekki sérstakt herrakvöld heldur er konum sérstaklega boðið að mæta,“ segir Guðmundur.

Um tíu fyrirsætur taka þátt í sýningunni og sýna alls fimmtíu heildarklæðnaði og má því gera ráð fyrir að mikill undirbúningur liggi að baki kvöldinu.

„Við erum á fullu þessa dagana við að máta fötin á fyrirsæturnar, enda þarf að klæða marga upp á. Við byrjum á því að sýna fatnað úr Herrafataverzluninni og endum svo sýninguna á nýju línunni. Í fyrra var mikið fjör baksviðs hjá strákunum en sem betur fer höfðum við nóg pláss og enginn lenti í því að týna skóm eða öðru lauslegu.“

Frítt er inn og hefst sýningin klukkan 21.00.