Bókarisinn Amazon gefur út svarbréf Bergsveins

Bókarisinn Amazon er í hópi fimm erlendra forlaga sem hafa keypt réttinn að Svari við bréfi Helgu eftir Bergsvein Birgisson. Jafn mörg forlög bíða átekta.

Fimm stæðileg, erlend forlög hafa keypt útgáfuréttinn að Svari við bréfi Helgu, metsölubók Bergsveins Birgissonar frá því í fyrra. Bókin kom út hjá þýska forlaginu Steidl, sem gefur meðal annars út bækur Gunters Grass og Halldórs Laxness í Þýskalandi, fyrir bókamessuna í Frankfurt.

Í haust festi franska forlagið Zulma, sem gefur einnig út bækur Auðar Övu Ólafsdóttur, sér réttinn. Á messunni sjálfri handsalaði Bjartur samning við danska forlagið C&K Forlag og nú í vikunni var gengið frá samningum við spænska forlagið RBA og útgáfurisann Amazon, sem gefur bókina út á ensku undir hatti frumkvöðlaverkefnisins Amazon Crossing.

Guðrún Vilmundardóttir hjá Bjarti er að vonum ánægð með góðar viðtökur bókarinnar á erlendri grund. „Þetta eru stór og stæðileg forlög og opnar á mikla möguleika. Ég veit að þýska, franska og spænska forlagið ætla að gera bókinni töluvert hátt undir höfði og hver sigur eykur líkurnar á þeim næsta," segir Guðrún og bætir við útgefendur frá Noregi, Svíþjóð, Tékklandi, Serbíu og Hollandi séu líka áhugasamir um bókina.

Spurð um áhrif bókamessunnar í Franfurt á viðtökurnar segir Guðrún þau vera talsverð. „Þýska forlagið, Steidl vildi gefa bókina út fyrir messuna, sem vakti athygli því þýskir útgefendur hafa ekki alltaf hraðar hendur. En þegar það gerist hefur það áhrif. Franski útgefandinn hjó til dæmis eftir því hversu fljótt bók kom út þar í landi. Um leið og íslensk bók kemur út í þýðingu á útbreiddu tungumáli stöndum við líka miklu betur að vígi"

Guðrún segir ekki tilgreint í samningum í hversu stóru upplagi Svar við bréfi Helgu kemur út. „Það eina sem getur gefið vísbendingu um hversu mörg eintök þeir ætli að selja sér er fyrirframgreiðslan, sem er óafturkræf, og í tilfelli Bergsveins er hún góð."

Samningurinn við Amazon sætir nokkrum tíðindum, enda er enski markaðurinn einn sá erfiðasti fyrir erlenda höfunda að komast á. Guðrún segir samninginn eiga sér nokkurn aðdraganda en ástæðan fyrir því að hann hafi ekki verið handsalaður fyrr en nú sé sú að fleiri enskir útgefendur hafi sýnt bókina áhuga. „Sem er tiltölulega sjaldgæft þegar íslenskar bækur eiga í hlut."