Kattamyndirnar seldust fljótt upp

„Þau eru svo til öll farin, bæði gefin og seld,“ segir rithöfundurinn og nú myndlistarkonan Vigdís Grímsdóttir. Málverk hennar af rauðum köttum sem voru til sýnis í Kaffihúsi Gerðubergs eru uppseld. Og eftirspurn eftir fleiri verkum Vigdísar er svo sannarlega til staðar. Rithöfundurinn lumar á nokkrum á heimili sínu í Úthlíð en er efins um að láta þau af hendi. „Ekki öll, mér þykir nú vænt um verkin,“ segir Vigdís, sem sagðist vera að passa þegar Fréttablaðið náði tali af henni.

Það vakti mikla athygli þegar Vigdís upplýsti í viðtölum að hún hefði farið að mála eftir að hafa lent í hálfgerðri ritstíflu fyrir tveimur og hálfu ári vegna nýjustu bókar sinnar, Trúir þú á töfra?, sem er nýkomin út. Bókin segir frá stúlku sem fer einmitt að mála rauða ketti á svartan múr umhverfis þorpið sitt. Penslarnir losuðu um stífluna svo um munaði og Vigdís er í dag mikill ástríðumálari eins og kom fram í helgarviðtali Fréttablaðsins um miðjan september. Fyrstu málverkin hennar þykja jafnframt hafa heppnast einstaklega vel, eiginlega það vel að málverkin fjörutíu, af öllum stærðum og gerðum, ruku út. Fleiri en Vigdís þorði nokkurn tímann að vona.

Rithöfundurinn fór auðvitað sínar eigin leiðir í sölu á myndunum sínum, enginn verðmiði var á þeim heldur gat fólk sent henni tölvupóst og sett fram verðhugmyndir sínar. „Það átti bara að vera í sambandi. Sumir vildu borga vel og aðrir vildu borga vel en aðeins lægri upphæð. Ég fékk hins vegar mörg mjög falleg bréf og þótti mjög vænt um það,“ segir Vigdís og viðurkennir að henni hafi komið það á óvart hversu háar fjárhæðir fólk var reiðubúið til að láta af hendi fyrir málverk eftir sig. Rithöfundurinn segist þó ekki vera orðinn ríkur á þessu hliðarspori sínu. „Nei, það er fullt af fólki sem vantar pening.“

freyrgigja@frettabladid.is