Þýskur nafni Geirs Haarde

Á samskiptavefnum Facebook er þýskur nafni fyrrverandi forsætisráðherra Íslands, Geirs Haarde. Pilturinn er þýskur námsmaður sem kaus sér nafnið sem notandanafn á Facebook en í raun heitir hann sjálfur Alex Mannan.

Facebook hélt innreið sína til Þýskalands síðar en á Íslandi, þar sem þýskir námsmenn notuðu heldur samskiptavef sem nefnist StudiVZ. Alex segir að þegar hann skráði sig loks sem notanda á Facebook hafi honum þótt sumar spurningarnar sem spurðar voru heldur persónulegar og því ákveðið að finna sér sérstakt notandanafn. „Ég valdi nafnið Geir Haarde þegar ég skráði mig sem Facebook-notanda árið 2008, þá var kreppan þegar komin á fullt. Ég hafði ekki heyrt fyrrverandi forsætisráðherra ykkar nefndan á nafn fyrr en íslenskir fjölmiðlar fóru að fjalla um kreppuna og var því meðvitaður um hver Geir Haarde var og að hann væri umdeild persóna í íslensku samfélagi en vissi að prófílmyndin mundi koma í veg fyrir að fólk færi mannavillt,“ útskýrir Alex.

Hann stundar nám í norrænum fræðum með áherslu á sænsku og íslensku við Háskólann í Tübingen. Hann þekkti þegar nokkuð vel til Svíþjóðar en lítið til Íslands og ákvað því að koma í skiptinám hingað til lands haustið 2008. „Það er mikið samstarf milli háskólans míns og Háskóla Íslands og hingað koma oft íslenskir skiptinemar. Ég hafði kynnst nokkrum Íslendingum sem stunduðu nám í Tübingen og þeir voru allir svo indælir að ég ákvað að fara heldur í skiptinám til Íslands en Svíþjóðar.“

Alex segir dvölina á Íslandi hafa farið fram úr öllum hans vonum en að það hafi komið honum töluvert á óvart hversu fullt af andstæðum landið var. „Þið eruð fá en samt er svo mikill stórborgarbragur yfir bæjunum, það rignir stanslaust en þrátt fyrir það er landið lítið gróið og mikið um eyðimerkur. En ég naut næturlífsins, námsins við HÍ, fisksins og bjórsins Kalda.“

Inntur eftir því hvort honum hafi þótt eitthvað neikvætt við land og þjóð nefnir Alex hátt verðlag á matvöru og froðuleysi á bjórnum. „Það vantar froðuna á bjórinn ykkar, án hennar smakkast bjórinn einfaldlega ekki jafn vel. Einu sinni hellti barstúlka í glas fyrir mig og þar sat svolítil froðukolla efst en hún mokaði henni úr og bætti bjór í glasið, hjartað í mér brast,“ segir hann glettnislega að lokum.

sara@frettabladid.is