Hafsteini hrósað í Variety

Hafsteinn Gunnar Sigurðsson, leikstjóri kvikmyndarinnar Á annan veg, er sagður vera hæfileikamaður sem kvikmyndaáhugafólk ætti að fylgjast vel með í náinni framtíð í kvikmyndabiblíunni Variety. Kvikmyndin sjálf fær prýðilega dóma og er kvikmyndatöku Árna Filippussonar hrósað sérstaklega. Hafsteinn er núna staddur á kvikmyndahátíð í Lübeck ásamt fleiri íslenskum leikstjórum og hann var að vonum ánægður með dóminn þegar Fréttablaðið náði tali af honum. Og hann ber sig vel í þýsku borginni. „Það er mjög vel hugsað um okkur hérna,“ segir Hafsteinn en meðal þeirra sem eru að skemmta Þjóðverjanum með myndum sínum eru Rúnar Rúnarsson, Árni Ólafur Ásgeirsson og Sverrir Þór Sverrisson.

Á annan veg fékk flotta dóma í íslenskum miðlum þótt aðsóknin hafi ekki verið upp á marga fiska. Hafsteinn er þó ekki af baki dottinn og er þegar farinn að undirbúa næstu kvikmynd en Þórir Snær Sigurjónsson mun framleiða hana. „Þetta er kvikmynd eftir handriti Huldars Breiðfjörð sem við tveir höfum verið að kasta á milli okkar að undanförnu.“ Hafsteinn Gunnar heldur tryggð við Vestfirði því myndin gerist á Flateyri og segir frá manni á þrítugsaldri sem glímir við mikla tilvistarkreppu þegar faðir hans kemur óvænt í heimsókn. Hafsteinn fer að hlæja þegar honum er bent á að þetta verði mynd um tvo menn á Vestfjörðum sem er ekki ólíkt umfjöllunarefninu í Á annan veg. „Ætli þetta verði ekki bara þríleikur um hvernig karlmennska þrífst fyrir vestan.“ - fgg