Lokað fyrir Bleikt.is hjá Reykjavíkurborg

„Ó, guð, núna skil ég af hverju lestur á síðunni hrundi um tíu til tuttugu prósent í síðustu viku,“ segir Hlín Einarsdóttir, ritstjóri afþreyingarvefsins Bleikt.is.

Tölvukerfi Reykjavíkurborgar lokaði fyrir aðgang að vefsíðunni, sem þýðir að starfsmenn borgarinnar og nemendur í grunnskólum hafa ekki getað lesið nýjustu fréttir vefsins, pistla og reynslusögur að undanförnu. Þúsundir einstaklinga tengjast tölvukerfi Reykjavíkurborgar á degi hverjum.

Hlín segir að það sé fyrst og fremst blóðtaka fyrir vefinn ef nemendur unglingadeilda skólans geti ekki farið inn á vefinn, en þeir skipi stóran sess í lesendahópi síðunnar.

Hjörtur Grétarsson hjá Upplýsinga- og tæknimiðstöð Reykjavíkurborgar segir málið tæknilegs eðlis, ekkert handafl búi þarna að baki sem loki fyrir aðgang að vefsíðum án nokkurs tilefnis. Hann vissi ekki hversu lengi vandamálið hafði staðið yfir. „Þetta var eitthvert stillingaratriði, svona gerist stundum og við erum núna búnir að laga þetta,“ segir Hjörtur.

Síðdegis í gær hafði vefurinn því verið opnaður aftur.- fgg