Amanda Seyfried leikur Lindu Lovelace

Amanda Seyfried hefur hreppt aðalhlutverkið í kvikmynd um Lindu Lovelace.

Linda varð heimsfræg þegar hún lék í klámmyndinni Deep Throat, en hún upplýsti seinna meir að tökurnar hefðu verið helvíti á jörð og að sér hefði verið nauðgað fyrir framan tökuvélarnar.

Linda, sem hét réttu nafni Linda Susan Boreman, leiddist út í harða fíkniefnaneyslu og bjó um hríð með ofbeldisfullri klámstjörnu sem neyddi hana út í vændi en hún kom loks lífi sínu á réttan kjöl og barðist þá harðlega gegn klámi og klámframleiðslu.

Myndin verður byggð á bókinni The Complete Linda Lovelace eftir Eric Danville og er framleidd af Rob Epstein og Jeff Friedman. Upphaflega stóð til að Kate Hudson léki í myndinni og þá kom Olivia Wilde einnig til greina. Þá bauðst James Franco hlutverk hins ofbeldisfulla Chuck Traynor en Peter Sarsgaard hefur nú tekið við því.