Justin Bieber í mútur

Justin Bieber átti í erfiðleikum með röddina þegar hann söng dúett með Mariuh Carey og vill umboðsmaður söngvarans meina að unglingsstjarnan sé komin í mútur. Bieber og Carey sungu saman gamlan slagara söngkonunnar, All I Want for Christmas Is You, og átti Bieber víst í miklum erfiðleikum með að ná háu tónunum.

„Fyrir ári hefðu þessir tónar ekki verið vandamál fyrir Bieber," segir umboðsmaðurinn Scooter Braun í viðtali við vefsíðuna Billboard.com.

Bieber er 17 ára gamall og ein vinsælasta poppstjarnan í heiminum i dag. Hann undirbýr nú plötuna Under the Mistletoe sem á að koma út á næstu dögum en ofangreint lag verður einmitt á þeirri plötu.