Grafa milljónafjársjóð niður í jörð

Fatahönnuðurinn Guðmundur Hallgrímsson, betur þekktur sem Mundi vondi, vinnur nú ásamt fleirum að dulkóðuðu þrautablaði sem vísar á falinn fjársjóð. Verðmætið er talið hlaupa á milljónum.

„Þetta er alvöru fjársjóður sem er fyrir tilstuðlan nokkurra fjársterkra aðila orðinn milljóna króna virði," segir Mundi án þess þó að tilgreina hvers eðlis fjársjóðurinn sé. Upplýsir þó að ekki sé loku fyrir það skotið að upphæðin muni hækka þar sem enn sé opið fyrir styrki.

Leitin að umræddum fjársjóði verður enginn barnaleikur ef marka má Munda. Vísbendingar um staðsetningu hans verður að finna í dulkóðaðri sögu í fyrrnefndu þrautablaði sem Mundi og félagar hafa varið meira en ári í að gera sem erfiðast aflestrar. „Við erum búnir að lesa okkur rækilega til um helstu dulkóða og þrautir sem gerðar hafa verið og þetta verður, vil ég meina, ein torveldasta þraut mannkynssögunnar," segir hann og gefur höfundi sögunnar, Magnúsi Birni Ólafssyni, orðið.

„Sagan er með goðfræðilegu ívafi og myndar umgjörð utan um stóra þraut. Hún samanstendur af köflum sem eru hver og einn smærri þrautir sem þarf að leysa til að komast áfram svo endanleg lausn fáist. Það verður tímafrekt verk."

Magnús og Mundi segjast báðir hafa þrælgaman af þrautum og gátum en áhugi hins síðarnefnda varð einmitt kveikjan að blaðinu. „Ég stóð að gerð sams konar en smærra blaðs ásamt útskriftarárganginum mínum í LHÍ um árið og mig hefur alltaf langað til að útfæra hugmyndina betur. Svo gafst bara rétta tækifærið og ég hóaði saman góðum mannskap með mér í verkefnið," segir Mundi en auk þeirra Magnúsar þurfti hvorki meira né minna en arkitekt, leikjahönnuð og myndlistarmann til að berja blaðið saman sem til stendur að gefa út á ensku í nokkrum löndum á næsta ári.

„Ég mæli með að fólki taki sig saman um að reyna að leysa þessa þraut því það verður líklegast ekki á færi einnar manneskju," segir Mundi og bætir við að sá möguleiki sé fyrir hendi að fjársjóðurinn finnist ekki á næstunni og kannski bara alls ekki.

„Við höfum gert ráðstafanir svo hann falli hvorki í verði né skemmist með því að setja hann í rakaþétta kistu sem þolir að vera grafin í jörðu næstu árin," segir hann og bætir við þegar hann sér undrunarsvipinn á blaðamanni:

„Já, það þarf að grafa hann upp, bókstaflega!"

roald@frettabladid.is