Auðunn Blöndal á FM957

„Mér líst alveg hrikalega vel á þetta og hlakka mikið til, þetta er miðill sem ég hef aldrei unnið við,“ segir Auðunn Blöndal. Hann vendir kvæði sín í kross á ferli sínum þegar hann hefur störf sem stjórnandi nýs síðdegisþáttar á FM 957.

Þættirnir verða á dagskrá alla virka daga milli fjögur og sex en honum hafði ekki enn verið gefið nafn þegar Fréttablaðið ræddi við Auðunn, Blö-vaktin kom hins vegar sterklega til greina og var líklegur kandídat. Auðunn verður hins vegar ekki einn í hljóðverinu við Skaftahlíð því á hverjum degi verður einn gestastjórnandi. Sverrir Þór Sverrisson, Egill Einarsson, Björn Bragi og Steindi Jnr. munu gegna þeim hlutverkum og hefur þeim verið úthlutaður einn dagur í viku. Auðunn veit ekki alveg hvort það sé hægt að flokka hann sem FM-hnakka, segist sjálfur flakka mikið á milli stöðva og sé alæta á tónlist. „En ég þekki auðvitað strákana þarna.“

Auðunn reiknar fastlega með því að vera með opna línu þannig að hlustendur geta hringt inn og spjallað við hann. Aðspurður hvort honum finnist þetta ekki skref niður á við, frá því að hafa verið nánast daglegur gestur á skjá landsmanna í tíu ár, að fara í útvarp segir hann það síður en svo. „Hefðirðu spurt mig fyrir fimm árum þá hefði mér örugglega þótt þetta skrýtið en ég er ekkert að segja skilið við sjónvarpið,“ segir Auðunn sem undirbýr nú af krafti framhaldsþáttaröð af Atvinnumönnunum okkar og sjónvarpsþáttinn Asíska drauminn en tökur á þeim báðum hefjast eftir áramót. - fgg