Leðurblökumanninum ákaft fagnað

Nýr tölvuleikur um Leðurblökumanninn er stærsta mál tölvuleikjaheimsins þessa dagana. Aðdáendur hans gátu hins vegar ekki beðið og slógu í síðustu viku upp grímuballi í miðborg Reykjavíkur þar sem alls kyns kynjaverur úr Batman-heiminum mættu til leiks.

„Ég var alveg hissa á því hvað margir mættu í flottum búningum," segir Sara Björk Másdóttir, sem skipulagði Batman: Arkham City búninga og útgáfuveisluna á Ölsmiðjunni en hún skrifar leikjadóma inn á afþreyingarsíðuna scene.is.

Sara, sem er þjónn á Tapas-barnum, fellur kannski ekki undir hina venjulega skilgreiningu tölvuleikjanjarðarins og hún segir að svona viðburðir séu einmitt kærkomnir fyrir fólk sem spilar tölvuleiki, þar geti þeir spjallað saman um áhugamálið sitt. „Tölvuleikir eru ekki bara fyrir nörda-stráka." Sara dæmir leiki fyrir scene.is og var einmitt á leiðinni að ná sér í eintak af Batman-leiknum til að spila yfir helgina. „Hann er rosalega flottur."

Smellið á myndina hér fyrir ofan til að fletta myndasafninu.

-fgg