Þráir stundum drykk

Rapparinn Eminem gaf út breiðskífuna Recovery síðasta sumar og flaug hún strax í fyrsta sæti vinsældalistans í Bandaríkjunum. Eminem viðurkennir í nýlegu viðtali að það geti stundum reynst erfitt að halda sér á beinu brautinni.

„Edrúmennskan hefur kennt mér ýmislegt og ég hef áttað mig á því að hún hjálpar einnig til við tónsmíðarnar. En stundum er þetta erfitt og þá óska ég þess að ég væri eins og venjulegt fólk og gæti farið út og fengið mér einn drykk. Áður skildi ég aldrei af hverju fólk talaði um þetta sem sjúkdóm, en ég hef áttað mig á því að það er rétt. Þetta er ömurlegur sjúkdómur,“ sagði rapparinn.