Óhamingjusöm raunveruleikastjarna

Raunveruleikastjarnan Kim Kardashian giftist körfuknattleiksmanninum Kris Humphries fyrir skemmstu. Fjölmiðlar hið vestra virðast ekki hafa mikla trú á hjónabandinu því þeir keppast við að flytja skilnaðarfréttir af hjónakornunum.

Samkvæmt fréttamiðlum í Bandaríkjunum er öllum í Kardashian-fjölskyldunni meinilla við Humphries og vonast til þess að Kim sæki um skilnað sem fyrst. Tímaritið People flutti einnig fréttir af því að Humphries hefði heldur kosið að fara út á lífið með vinum sínum en að sækja eiginkonu sína upp á flugvöll. „Hann særir hana stanslaust. Hann fer út að skemmta sér með vinum sínum í Miami í stað New York því hann telur minni líkur á að Kim frétti af strákapörum hans þar. Hann hagar sér einnig eins og hann sé enn einhleypur og sást meðal annars leiða ljóshærða stúlku út af skemmtistað,“ var haft eftir innanbúðarmanni.