Westlife hættir á næsta ári

Ein ástsælasta strákasveit írlands, Westlife, mun hætta eftir veglega tónleikaferð á næsta ári. Írar syrgja sveitina, sem naut mikillar hylli. Fjórtán ára samstarfi strákasveitarinnar Westlife lýkur á næsta ári þegar fjórmenningarnir leggja upp í sína síðustu tónleikaferð. Í yfirlýsingu sem sveitin sendi frá sér kemur fram að þetta hafi verið sameiginleg ákvörðun. „Við höfum eytt öllum okkar fullorðinsárum saman og erum sammála um að fara í gott og langþráð frí. Við viljum þakka aðdáendum okkar sem hafa ferðast með okkur á þessu ótrúlega ferðalagi.“

Þeir Nicky Byrne, Kian Egan, Mark Feehily og Shane Filan eru nánast þjóðhetjur á Írlandi og Gordon Smart, ritstjóri afþreyingarhluta breska blaðsins The Sun, segir í litlum greinarstúf á vef blaðsins að það hafi fallið tár á írskum knæpum í gær þegar tíðindin bárust. Fjórmenningarnir hafa grætt á tá og fingri á samstarfinu, selt yfir 44 milljónir platna og komið fjórtán smáskífum á toppinn í Bretlandi. Samkvæmt The Sun er hver og einn metinn á rúmar tíu milljónir punda, eða 1,8 milljarða íslenskra króna. „Þetta er búið, það eru engin leiðindi og þeir eru ennþá miklir vinir en þeir vilja einbeita sér að sínum eigin hlutum,“ hefur The Sun eftir heimildarmanni sínum.

Westlife braust fyrst fram á sjónarsviðið 1998, þá sem kvintett en Brian McFadden yfirgaf sveitina eftir sex ára dvöl. Westlife var meðal annars á mála hjá útgáfufyrirtæki Simons Cowell og varð strax ákaflega vinsæl, sveitin var jafnvel sögð vera svar karla við Spice Girls. Þeir heimsóttu Ísland fyrir tveimur árum þegar þeir gerðu myndband við lagið What About Now sem var síðar frumsýnt í breska X-Factor. Talið er að fjórmenningarnir muni ekki þurfa að sitja með hendur í skauti en tilboðum um sjónvarpsþætti og sólóplötur er þegar farið að rigna yfir þá.freyrgigja@frettabladid.is