Úr 1.500 áhorfendum í fjörutíu

Víkingarokksveitin Skálmöld lýkur tónleikaferð sinni um Evrópu í Austurríki á sunnudaginn. Alls verða tónleikarnir 24 talsins á 24 dögum og í ellefu löndum, eins og Fréttablaðið hefur greint frá. „Þetta hefur gengið virkilega vel. Þetta er búið að vera alveg magnað,“ segir söngvarinn Björgvin Sigurðsson, sem var staddur í Búdapest þegar blaðamaður náði sambandi við hann.

Tónleikaferðin kallast Heidenfest og er þetta þriðja árið í röð sem hún er farin. Skálmöld stígur fyrst á svið og iðulega hefur sveitin spilað fyrir nokkur hundruð manns upp í 1.500 eins og gerðist í HMV Forum í London. Tvisvar á síðustu dögum hafa þó einungis verið mættar um fjörutíu hræður á tónleika þeirra, eða í Þýskalandi og í Slóveníu. „Það er svolítið skrítið að fara úr því að spila fyrir allt að 1.500 manns og svo fyrir hálftómum stað. Ég skal viðurkenna að maður var orðinn of góðu vanur,“ segir Björgvin og hlær. „En við gefum aldrei eftir. Þessi ferð er fyrir okkur og er farin til að safna liði. Hver einasti haus telur.“

Skálmöld ferðast um í stórri, tveggja hæða rútu ásamt norsku sveitinni Trollfest og hinni rússnesku Arkona en alls eru þrjár rútur á sama ferðalagi. Björgvin og félagar eru með svefnaðstöðu á efri hæðinni. Spurður hvort ferðalagið hafi verið erfitt segir hann að keyrslan geti verið þreytandi. „Þetta er búinn að vera heilmikill þvælingur fram og til baka. Þetta er rosaleg keyrsla, yfirleitt á hverjum degi, en það er keyrt á nóttunni,“ segir söngvarinn.

Skosku sjóræningjarokkararnir í Alestorm hafa einnig ferðast með Skálmöld og hafa tekist góð kynni með þeim tveimur böndum, að sögn Björgvins. - fb