Gullkálfinum ekki slátrað

Steven Spielberg og Michael Bay eiga í viðræðum við Paramount-kvikmyndaverið og Hasbro-leikfangaframleiðandann um gerð fjórðu og fimmtu Transformers-kvikmyndanna. Leikfangaframleiðandinn er sagður eiga frumkvæðið að þessum viðræðum enda hafa fyrstu kvikmyndirnar þrjár reynst sannkallaðar gullnámur hvað sölu á leikföngum varðar.

Samkvæmt frétt Variety hafa Hasbro og Paramount háleitar hugmyndir um framtíð Transformers og vilja allra helst gera tvær myndir í einu. Hins vegar er vitað að leikstjórinn Bay er ekkert svakalega spenntur fyrir því að setjast aftur í leikstjórastólinn, hann hefur augastað á öðrum verkefnum. Vefur kvikmyndatímaritsins Empire bendir hins vegar á að Bay sé mannlegur, hann fái gommu af seðlum fyrir verkefnið og þar að auki tækifæri til að leika sér með allt það nýjasta í tæknibrelluheiminum.

Á hinn bóginn er öruggt að aðalleikarinn, Shia LaBeouf, verður ekki lengur með. En það kemur ekki að sök í svona tæknibrellumyndum, menn geta auðveldlega kokkað upp nýjan söguþráð og hetju og sá sem helst hefur verið nefndur sem arftaki aðalhlutverksins er breski harðhausinn Jason Statham. - fgg