Norrænn tryllir af bestu gerð

Norska kvikmyndin Hodejegerne verður frumsýnd um helgina en hún er byggð á samnefndri sögu eftir norska glæpasagnahöfundinn Jo Nesbø, Varla þarf að taka það fram að Hollywood hyggst endurgera myndina enda virðist Kaninn sjúkur í allt sem norrænt er um þessar mundir.

Myndin segir frá Roger Brown, farsælum hausaveiðara sem er giftur gullfallegri konu, á stórkostlegt hús og virðist ekki skorta neitt, nema peninga því hann þarf að stela rándýrum málverkum til að fjármagna lúxus-lífstílinn. Þegar hann kemst í kynni við Clas Greve, fyrrum meðlim úrvalssveitar hersins, og uppgötvar að sá á verðmætt málverk tekur við æsispennandi atburðarás. Með aðalhlutverkin í myndinni fara þau Nikolaj Coster-Waldau, Aksel Hennie og Julie R. Ølgaard. -fgg