Fimm hugmyndir íbúa skoðaðar á mánuði

Íbúum Reykjavíkurborgar gefst kostur á að hafa bein áhrif á borgarmálin í gegnum vefinn Betri Reykjavík sem hleypt var af stokkunum í gær á slóðinni betrireykjavik.is.

Borgarbúar geta skráð sig á vefinn og sett þar fram hugmyndir, skoðað hugmyndir annarra, rökstutt mál eða breytt vægi hugmynda með því að styðja þær eða lýsa sig andsnúna þeim.

Þær fimm hugmyndir sem með þessum hætti hljóta mest vægi í hverjum mánuði verða teknar til meðferðar hjá viðkomandi fagráði og þar að auki fer fram sérstök umræða í ráðinu um efstu hugmyndina.

Gert er ráð fyrir að vefurinn verði þróaður áfram í þá átt að hann geti orðið vettvangur rafrænna kannana eða samráðs af ýmsu tagi. Þá er einnig raunhæfur möguleiki á rafrænum kosningum í gegnum vefinn.- sh