Samningur í San Francisco

Pönksveitin fornfræga Q4U er í þann mund að skrifa undir plötusamning við útgáfufyrirtæki í San Francisco. „Það á að gefa okkur út á vínYl, sautján lög, bara gömul,“ segir gítarleikarinn Ingólfur Júlíusson. Einnig er líklegt að lögin verði gefin út í stafrænu formi.

Brasilíumenn eru einnig hrifnir af Q4U og kom safnplata með sveitinni út þar í landi í júlí hjá þarlendu útgáfufyrirtæki. Áður hafði eitt lag með henni komið út á annarri safnplötu. Spurður um söguna á bak við bandaríska útgáfusamninginn segir Ingólfur: „Það var náungi í San Francisco sem eignaðist plötu með okkur fyrir mörgum árum. Hann var lengi búinn að vera að reyna að hafa uppi á okkur og fékk loksins samband í gegnum útgáfufyrirtækið okkar í Brasilíu.“

Q4U er með slatta af nýjum lögum á lager og ætlar von bráðar að hefja upptökur á plötu sem kæmi út á næsta ári.

Sveitin spilaði á Airwaves-hátíðinni í fyrsta sinn á Amsterdam á sunnudaginn og voru viðtökurnar góðar. „Það kom pínulítið á óvart hvað það var rosaleg stemning. Þarna voru aðallega útlendingar.“

Auk Ingólfs eru í Q4U þau Gunnþór Sigurðsson á bassa, söngkonan Ellý, trommarinn Guðjón Guðmundsson og Árni Daníel Júlíusson hljómborðsleikari. Næstu tónleikar þeirra verða á pönkhátíð í Kópavogi um næstu helgi. - fb