Biðlisti í fangelsi styttist með aukinni samfélagsþjónustu

Alls bíða 368 eftir afplánun refsivistar, samkvæmt upplýsingum sem fram komu á fundi allsherjar- og menntamálanefnd með Ögmundi Jónassyni innanríkisráðherra í gær. Ráðherra segir að með því að fara eftir lögum sem Alþingi samþykkti um fullnustu refsingu sé hægt að fækka um 100 á biðlistanum.

Alþingi samþykkti í september að víkka út heimildir til samfélagsþjónustu í stað refsivistar. Áður var hægt að beita þeim úrræðum gagnvart þeim sem höfðu hlotið sex mánaða dóm eða minna, en nú miðast það við níu mánaða dóm.

Páll Winkel fangelsismálastjóri segir að lagabreytingin sé meiri háttar skref í fangelsismálum landsins. Með aukinni samfélagsþjónustu og rafrænu eftirliti til fullnustu refsingar sé Ísland komið framarlega í málaflokknum, miðað við nágrannalöndin.

Þegar er unnið að því hjá Fangelsismálastofnun að taka á móti þeim sem munu gegna samfélagsþjónustu. Rafrænt eftirlit gæti tekið meiri tíma og verið kostnaðarsamara, að sögn Páls.

Ögmundur sagði á fundi allsherjar- og menntamálanefndar í gær að hann vildi skoða frekari möguleika á annars konar refsingum en fangelsisvist. „Ég er þeirrar skoðunar að í fangelsi eigi aðeins að sitja þeir sem eru samfélaginu hættulegir."

Ögmundur segir tilkostnaðinn við samfélagsþjónustu einhvern, en ekkert í líkingu við kostnaðarsama sólarhringsgæslu með fullu fæði. „Þá er þetta miklu manneskjulegri og uppbyggilegri leið."

Páll segir að efling þessa úrræðis sé samfélagslega mikilvæg. Eftir standi þó að tvö ónýt fangelsi séu enn notuð og úr því verði að bæta.

Ráðherra upplýsti á nefndarfundinum að kostnaður við uppbyggingu nýs fangelsis á Hólmsheiði kæmi fram í annarri umræðu fjárlaga. Frumhönnun fangelsisins liggi fyrir.

kolbeinn@frettabladid.is