Elding raskaði leiksýningum

„Sýningin var við það að byrja og þá allt í einu lækka ljósin og hljóðið dettur út,“ segir Tinna Hrafnsdóttir, leikkona í Hrekkjusvínunum, en sýningin raskaðist af völdum eldingar á föstudagskvöldið.

Mikið aftakaveður var á höfuðborgarsvæðinu á föstudaginn en þegar klukkan var rétt rúmlega átta um kvöldið laust eldingu niður í miðbæ Reykjavíkur og olli tímabundnu rafmagnsleysi á ýmsum stöðum.

„Við lentum ansi illa í því og þetta hafði mikil áhrif á sýninguna þó að rafmagnið hafi aðeins dottið út í örfáar sekúndur,“ segir Tinna en um frumsýningu á Hrekkjusvínunum var að ræða í Gamla bíói og rafmagnsleysið gerði það að verkum að tíðni þráðlausu hljóðnemanna riðlaðist og hljóðgæði sýningarinnar voru langt í frá fullnægjandi. Sýningin fékk mjög góðar viðtökur áhorfenda þrátt fyrir að rafmagnsleysið hafi óneitanlega sett strik í reikninginn og af þeim sökum vilja aðstandendur sýningarinnar bjóða þeim frumsýningargestum sem þess óska aftur á sýninguna. „Þeim sem vilja koma aftur er velkomið að hafa samband við miðasölu Gamla bíós.“

Sýningargestir á leikritinu Svartur hundur prestsins í Þjóðleikhúsinu fengu tvö hlé vegna þess að rafmagnið datt út.

„Það vill svo skemmtilega til að sýningin hefst á rafmagnsleysi svo ég er ekki viss um að áhorfendur hafi áttað sig á þessu strax,“ segir Nanna Kristín Magnúsdóttir leikkona en ljósaborðið sló út og leikararnir byrjuðu að spinna í kjölfarið. „Við erum náttúrulega þjálfuð í takast á við svona aðstæður en svo fengu áhorfendur bara aukahlé á meðan ljósaborðið var endurræst. Þetta skapaði bara meiri nánd við salinn.“ - áp