Fortíðin lifnaði við á Íslandsviku í Sóltúni

„Það er ótrúlega gefandi og gaman að bregða svona á leik," segir Anna Birna Jensdóttir, forstöðumaður Hjúkrunarheimilisins Sóltúns, þar sem Íslenskir dagar voru á dagskrá í síðustu viku.

Sóltúnsheimilið var skreytt hátt og lágt með íslenskum munum. Ýmis þemu voru í gangi á hinum ýmsu hæðum og göngum. Til dæmis var Reykjavík fimmta áratugarins gerð skil á einum stað og Vestmannaeyjar voru í öndvegi á öðrum stað. Tónlistarfólk kom í heimsókn og íslensk matarmenning liðinna daga í hávegum höfð. Áður hafa meðal annars verið Franskir dagar og Tékkneskir dagar í Sóltúni sem gert hafa mikla lukku.

„Það myndast samvinna milli íbúa, ættingja og okkar starfsfólksins. Það er alveg ótrúleg hugmyndaauðgi sem kemur frá fólki," segir Anna Birna. Meðalaldur íbúanna á Sóltúni er 84 til 85 ár. „Fólk kom með alls kyns leikföng og muni frá því að það var ungt og endurminningarnar streymdu fram. Það spruttu upp leiðbeiningar til okkar unga fólksins um það hvernig þessir hlutir voru notaðir og þetta hefur verið mjög gjöfult og skemmtilegt," segir forstöðumaðurinn.

Rúsínan í pylsuendanum var maturinn sem var á boðstólum. Sá þáttur náði hátindi með hátíðarkvöldverði í lok íslensku daganna. „Við vorum með hefðbundinn íslenskan mat; til dæmis siginn fisk, saltfisk og gellur og sveskjufyllt lambalæri sem fólk hafði mikla ánægju af. Það var gamla góða bragðið sem fólkið mundi eftir. Síðan var fínerí eins og sérrífrómas," lýsir Anna Birna sem kveður þó sviðakjammana hafa slegið hvað rækilegast í gegn.

„Fólkinu leiddist ekki að fá kjamma í hendurnar. Það var alveg upplifun að sjá hversu ánægt fólkið var," segir Anna Birna Jensdóttir.

gar@frettabladid.is