Whitney neitaði að spenna beltið

Litlu munaði að söngdívunni Whitney Houston væri hent út úr flugvél er hún neitaði að spenna sætisólarnar í flugtaki. Houston var á leið sinni með Delta-flugfélaginu frá Atlanta til Detroit en brást ókvæða við er flugfreyja bað hana vinsamlegast um að spenna beltin, eins og venja er í flugtaki og lendingu.

Eftir nokkurt þras við Houston þurfti flugfreyjan sjálf að beygja sig niður og spenna beltið utan um söngkonuna. Frá þessu greinir vefsíðan tmz.com, en samkvæmt nánum vini söngkonunnar var Houston ekki undir áhrifum í flugvélinni heldur einungis fúl því hún missti af flugvél fyrr um daginn.

Houston er þessa dagana að reyna að lappa upp á feril sinn og var á leiðinni til Detroit til að leika í kvikmynd.