Kim Larsen sagður vondur pabbi

Kim Larsen er vafalítið einn dáðasti tónlistarmaður Dana fyrr og síðar, plötur hans seljast alltaf í bílförmum, lögin hafa lifað lengi með dönsku þjóðinni og Larsen sjálfur er erkitýpa þjóðarsálarinnar; „ligeglad“.

En ný ævisaga um kappann, Solisten, hefur leitt það í ljós að Larsen er „ligeglad“ um þrjú elstu börnin sín. Larsen, sem á sex börn, hefur lítið samband við börnin sín frá tveimur fyrstu hjónaböndunum. Hann er orðinn afi en hefur sáralítið af barnabörnum sínum að segja, og þau fá ekkert að hitta sinn heimsfræga afa. Danskir fjölmiðlar fjalla ítarlega um málið enda hefur Kim Larsen verið ákaflega annt um einkalíf sitt, varið það með kjafti og klóm. Sjálfur upplifði hann mikla höfnun aðeins fimm ára gamall er faðir hans yfirgaf fjölskylduna.

Bókin Solisten dregur á flot fólk, nátengt honum, sem hefur aldrei áður tjáð sig um hann. Meðal þeirra er elsta dóttirin Alice Eva sem segir í bókinni að hún hafi ekki hitt pabba sinn síðan 2007. „Ég er búin að gefast upp á því að hafa samband við hann. Hann er bara svona.“ Hún bætir því við að skilnaður móður hennar og Larsens hafi komið eins og þruma úr heiðskíru lofti en hún var þá aðeins fimmtán ára gömul. Hún hafi aldrei fengið neinar skýringar á skilnaðinum. „Þegar ég skrifaði bréf til pabba fékk ég bara póstkort frá Óðinsvéum, sem var boð um að koma og heimsækja hann og nýju kærustuna hans. Þannig er þetta alltaf hjá honum, maður þarf að ganga á eftir honum.“

- fgg