Bolurinn hefur fílað þetta

„Ég hef ekkert fylgst með viðbrögðunum enda les ég ekki blöðin og hlusta ekki á útvarp og hætti á Facebook fyrir hálfum mánuði síðan,“ segir Gísli Rúnar Jónsson, leikstjóri Kexvexmiðjunnar og annar höfundur þáttanna.

Þættirnir eru á dagskrá RÚV á laugardagskvöldum og hafa fengið misgóðar viðtökur. Fjölmiðlapistlar hafa verið skrifaðir og Facebook-síður hafa logað. Áhorfstölur segja hins vegar aðra sögu, þættirnir mælast með yfir þrjátíu prósenta áhorf en Gísla kemur það ekki á óvart. Hann bendir á að slíkt áhorf sé nánast skylda í þessu svokallaða slotti eða dagskrártíma, það séu hvort eð allir að horfa. Hringekjan mældist til dæmis jafnan með um og yfir tuttugu prósenta áhorf í fyrra. „Bolurinn, eins og Bó kallar þetta, hefur fílað þetta og ætlunarverk okkar virðist vera að takast, þeir sem þátturinn átti að höfða til eru ánægðir en síðan er alltaf svolítill hávaði í þeim sem líkar þetta ekki,“ segir Gísli.

Gísli Rúnar er öllu vanur í umfjöllun um verk sín og hann rifjar upp að fyrir 23 árum hafi hann gert Heilsubælið fyrir Stöð 2. Þeir þættir nutu töluverðra vinsælda en: „Síðan voru einhver tíu prósent sem voru mjög óánægð og þau virtust hafa greiðan aðgang að fjölmiðlum. Í þau fjörutíu ár sem ég hef verið að gera skemmtiefni man ég aldrei eftir „instant“ jákvæðum og fagnandi viðbrögðum við sjónvarps-eða útvarpsefni,“ segir Gísli. „Hinir óánægðu láta yfirleitt vita af sér fyrst.“- fgg