Vinnur með virtum danshöfundi

Valgerður Rúnarsdóttir, dansari og danshöfundur, hefur undanfarin fjögur ár unnið með belgíska danshöfundinum Sidi Larbi Cherkaoui en hann þykir einn sá virtasti í sínu fagi og er ákaflega eftirsóttur í leikhúsum og hjá listamönnum úti um allan heim. Valgerður hefur ferðast um allar trissur með Cherkaoui og nú hefur samstarf þeirra leitt þau til London fyrir kvikmyndina Önnu Karenínu sem skartar Jude Law og Keiru Knightley í aðalhlutverkum en eins og Fréttablaðið greindi frá í vikunni leikur Hera Hilmarsdóttir einnig í myndinni.

„Ég fer út eftir tíu daga. Myndin er tekin upp í stúdíói í London og þetta er mikið búningadrama,“ segir Valgerður en hún lék einnig í kvikmynd Hafsteins Gunnars Sigurðssonar unnusta síns, Á annan veg, sem nú er sýnd í Bíó Paradís. Valgerður aðstoðar Hilmar Guðjónsson í þeirri mynd í litlu dansatriði sem vakti töluverða athygli. Hún viðurkennir hins vegar að það verði eflaust aðeins öðruvísi að leika annars vegar í íslenskri kvikmynd þar sem settið er íslensk náttúra í öllu sínu veldi og svo risavaxinni og rándýrri stórmynd þar sem leikararnir skipta tugum ef ekki hundruðum. „Og búið er að eyða milljónum á milljónum ofan í leikmynd og búninga,“ segir Valgerður.

Cherkaoui er með fleiri járn í eldinum og Valgerður býst við því að vera með honum í nýju verkefni á næsta ári sem mun væntanlega útheimta mikil ferðalög. „Hann er mjög krefjandi á góðan hátt, sýningarnar hans mælast mjög vel fyrir og það er mjög skemmtilegt að fá svona tækifæri,“ segir Valgerður sem jafnframt er á fullu við að semja eigin verk. „Þá er maður bara að harka og sækja um styrki og reyna að koma þeim á framfæri erlendis.“- fgg