Gerist ferðamaður í eigin landi á Airwaves-hátíðinni

„Ég ætla að drekka í mig menningu, músik og Reykjavík,“ segir Jón Gunnar Geirdal, markaðssérfræðingur hjá N1.

Iceland Airwaves-hátíðin hefst á fimmtudaginn og Jón Gunnar bíður spenntur. Hann er búinn að vera lengi að skipuleggja vikuna og hyggst taka hátíðina alla leið, er búinn að leigja hótelherbergi og hyggst flakka um höfuðborgina eins og erlendur ferðamaður yfir hátíðina. „Ég geri þetta af einskærum áhuga á tónlist. Það er svo gaman að sjá borgina lifna við,“ segir Jón Gunnar. „Þar sem ég á sumarfrí inni ákvað ég að taka mér helgarfrí í Reykjavík — tourist-style.“

Og hátíðin hefst strax á miðvikudaginn hjá Jóni. „Ég byrja í lunch á Kexi á miðvikudaginn. Ætla að sjá GusGus klukkan eitt, hún kickstartar hátíðinni. Svo er ég í fríi hálfan daginn á fimmtudaginn, allan föstudaginn og gisti á hóteli um helgina.“

Jón segist ætla að nýta tímann og ráfa um Reykjavík. „Maður skoðar aldrei þessa gullfalegu borg,“ segir hann. „Maður fer í bæinn á 17. júní, Gay Pride og menningarnótt. Svo þessar helgar sem maður kíkir út á lífið. En Reykjavík er alveg stórkostleg borg, það er ástæða fyrir því að allir þessir ferðamenn koma hingað. Ég gef mér það allavega.“

Ásamt því að fara á tónleika ætlar Jón Gunnar að skoða kennileiti, garða, styttur og söfn. „Maður hefur alveg kíkt á alla þessa staði, það er ekki það. En mig langar að taka helgi í þetta, eins og ég væri í útlöndum,“ segir Jón. „Svo eru æðislegir tónlistarmenn frá öllum heimshornum að spila í öllum skúmaskotum, hvort sem það eru bókabúðir, hótel eða tónleikastaðir.“

Jón býr í Kópavogi og dvelur á Hilton hótel Nordica á meðan hátíðin stendur yfir. „Maður er að fá sér bjór og rauðvín, sulla aðeins. Það fylgir þessu tónleikabrölti. Leigubíll væri 25, 30 þúsund kall fyrir helgina. Það borgar bara upp hótelið,“ segir hann.

Airwaves-hátíðin hefur verið fastur liður hjá Jóni undanfarin ár, en það er einn viðburður sem hann missir aldrei af. „Maður tekur Lónið á laugardeginum, þar sem ég er Margeirs-grúppía,“ segir hann. „Það síðasta sem ég myndi sleppa á Airwaves væri að fara í Lónið.“atlifannar@frettabladid.is