Undirbýr spurningakeppni grunnskóla

Hannes Daði Haraldsson, framkvæmdastjóri Spurningakeppni grunnskólanna, segir mikla sprengingu hafa orðið í þátttöku keppninnar og taka nú alls sextíu og þrír grunnskólar þátt.

Fyrir tveimur árum tók ÍTR þá ákvörðun að ekki væri lengur fjárhagslegur grundvöllur fyrir því að halda Nema hvað?, spurningakeppni grunnskólanna í Reykjavík. Enn var þó áhugi til staðar meðal skólanna að taka þátt í keppninni og ákvað Hannes Daði að sér skipulagningu hennar.

Hann semur sjálfur spurningarnar og sér um alla framkvæmd hennar. Fyrsta árið tóku aðeins fjórtán skólar þátt en í ár hefur orðið sprenging í þátttöku og alls keppa sextíu og þrír skólar til sigurs, þar af fjörutíu og tveir skólar af landsbyggðinni.

Inntur eftir því af hverju hann ákvað að taka að sér skipulagningu keppninnar segir Hannes Daði að áhuginn hafi verið til staðar auk þess sem honum þyki gaman að keppninni.

„Ég tók sjálfur þátt árið 2005 fyrir hönd Breiðholtsskóla þegar ég var í tíunda bekk og þótti þetta bæði fræðandi og skemmtilegt. Ég tók svo að mér að þjálfa lið skólans og þótti þess vegna leiðinlegt að sjá á bak keppninni.

Áhugi nemenda og skólastjórnenda var þó enn til staðar og þess vegna tók ég þetta að mér,“ útskýrir hann.

Hannes Davíð hætti að þjálfa lið Breiðholtsskóla og sneri sér þess í stað að því að semja spurningar fyrir keppnina. „Ég sæki mér víða fanga og finn efni í spurningar úr bókum, minni eigin þekkingu og á Netinu.“

Keppnin hefur göngu sína í byrjun næsta árs og verður gaman að fylgjast með gengi grunnskólanna. -sm