Gefur út bók um sushi-rétti

Rósa Guðbjartsdóttir, bæjarfulltrúi í Hafnarfirði og rithöfundur, gefur á næstunni út þýdda bók um gerð sushi-rétta sem heitir Einfaldara sushi.

Aðspurð segist hún hafa verið mikill sushi-áhugamaður síðan á unglingsárunum. „Ég var byrjuð að prófa að gera sushi á mennta- og háskólaárunum. Á undanförnum árum hef ég tekið þetta upp aftur því krökkunum mínum finnst þetta svo gott. Þetta er líka svo hollt og hráefnin eru fersk. Það er ekki verra hvað þetta er gómsætt,“ segir Rósa, sem býr til sushi heima hjá sér bæði hvunndags og fyrir veislur.

Matreiðslumaðurinn Steven Pallett samdi bókina sem Rósa hefur þýtt og kemur út hjá Bókafélaginu. Með henni fylgir mynddiskur þar sem fjallað er nánar um sushi-matreiðslu og kassi með áhöldum til sushi-gerðar. Þetta er fyrsta bókin sem Rósa þýðir og telur hún að rit sem þetta hafi vantað á íslensku. Allar uppskriftirnar voru staðfærðar og aðlagaðar að íslenskum aðstæðum. Til þess fékk Rósa til liðs við sig einn fremsta sushi-matreiðslumann Íslands, Sigurkarl Guðgeirsson, sem rekur veitingastaðinn Su-zushii í Kringlunni.

Fyrir tveimur árum gaf Rósa út sína fyrstu matreiðslubók, Eldað af lífi og sál, sem fékk góðar viðtökur. Aðspurð segir hún vera með nýja bók í smíðum sem er væntanleg á næsta ári. - fb