Stórskotalið gerir norska Næturvakt

Norska sjónvarpsstöðin TV2 teflir fram öllum sínum stærstu og sterkustu vopnum þegar endurgerð á Næturvaktinni hefst í byrjun næsta árs. Leikstjóri verður Magnus Martens sem þessa dagana er að klára kvikmyndina Arme Riddere eftir bók norska sakamálahöfundarins Jo Nesbø og þrír af vinsælustu gamanleikurum Noregs verða í aðalhlutverkunum að sögn Christophers Haug, eins af aðalframleiðendum leikins efnis hjá TV 2.

„Bensínstöðin verður í afskekktu bæjarfélagi einhvers staðar úti á landi,“ segir Haug í samtali við Fréttablaðið. Upphaflega stóð til að norska ríkissjónvarpið, NRK, myndi gera þættina en þau áform duttu upp fyrir og TV2 stökk um borð. Haug bætir því að handrit Næturvaktarinnar verði vissulega lagað að norskum húmor. „Upphaflega handritið var mjög gott en áherslur í norskum og íslenskum húmor eru eilítið öðruvísi þannig að við verðum að breyta einhverju,“ segir Haug sem vildi ekki gefa upp hvaða leikarar kæmu til greina í hlutverkin, sagði það skýrast í nóvember.

Leikstjórinn Martens fer fyrir handritateymi þáttaraðarinnar en það verður auk þess skipað þeim Karsten Fullu og Mads Løken. Svo skemmtilega vill til að Fullu skrifaði handrit að nokkrum þáttum norsku útgáfunnar af Hjá Marteini sem RÚV gerði síðar meir sína eigin útgáfu af með Jóhannesi Hauki Jóhannessyni í aðalhlutverki. „Við höfum mikla trú á þessu verkefni og vonum að Norðmenn og Íslendingar eigi eftir að hlæja sig máttlausa. Ég gerði það allavega yfir íslensku útgáfunni.“ - fgg