Þurfa ekki að hlusta

Chris Martin, söngvari Coldplay, segist ekki neyða börnin sín til að hlusta á tónlistina hans. „Ég neyði tónlistina ekki ofan í þau. Enginn í fjölskyldunni þarf að hlusta á hana,“ sagði Martin, spurður hvort börnin hans hlustuðu á Coldplay. Hann á tvö börn, hina sjö ára Apple og hinn fimm ára Moses. Söngvarinn viðurkennir að barneignir hans hafi breytt sköpunarferli Coldplay.

„Ég er líka orðinn einbeittari vegna þeirra og vil ekki eyða tíma í eitthvað sem er ekki þess virði. Maður vill ekki eyða mörgum mánuðum í eitthvað sem hljómar á endanum ömurlega. Á endanum snýst þetta um að gera börnin sín stolt af manni.“ Coldplay gefur út plötuna Mylo Xyloto síðar í þessum mánuði.