Ekki hrifin af lýtaaðgerðum

Leikkonan Michelle Pfeiffer er ekki sérlega hrifin af lýtaaðgerðum en segir mikilvægt að fólk sé sátt við útlit sitt. Pfeiffer segist ekki geta fundið að því að fólk lagfæri hitt og þetta en viðurkennir að sér finnist sorglegt þegar fólk gengur of langt í þeim málum. „Þegar fólk hættir að líta út eins og það sjálft þá finnst mér það sorglegt. Mér finnst óþægilegt að sjá þannig fólk, en ef það er sjálft sátt við útlit sitt þá ætti álit mitt ekki að skipta máli,“ sagði leikkonan í viðtali við Elle.

Í sama viðtali minnist hún þess tíma er hún lék í kvikmyndinni Scarface ásamt Al Pacino. „Ég var logandi hrædd allan tímann. Ég átti ekkert í þessa stórleikara, ég var bara lítil, grannvaxin stúlka sem hafði leikið í Grease 2.“