Finnur efnivið í skart hér og þar

Kristjana Jenný Ingvarsdóttir útstillingahönnuður hannar og selur fylgihluti og gjafavörur undir nafninu Mydesign. Fylgihlutirnir eru að mestu unnir úr endurunnu efni svo sem stáli, messing, tré og gömlu skarti.

Kristjana Jenný hefur framleitt gjafavörur undanfarin þrjú ár en færði sig út í fylgihlutaframleiðslu í janúar á þessu ári er hún var í fæðingarorlofi. „Ég vil frekar kalla þetta fylgihluti en skart því ég tel mig ekki vera skartgripahönnuð, ég er bara að prófa mig áfram með eitthvað sem mér þykir skemmtilegt,“ segir Kristjana.

Hún segist hafa fengið fín viðbrögð frá fólki við vörunum og vonast til þess að hún geti haft lifibrauð sitt af þessu í framtíðinni. „Ég er tiltölulega nýbyrjuð og þetta er enn þá bara áhugamál, en vissulega vonar maður að hægt verði að hafa upp úr þessu í framtíðinni. Draumurinn er líka að koma með heimilislínu og barnalínu á næstu árum.“

Kristjana sankar að sér ýmsu dóti til að vinna vörur sínar úr, þar á meðal viði, hnífapörum, gömlum skartgripum og öðru smálegu. „Í sjálfu sér sé ég möguleika í flestu. Ég bjó lengi úti og þá var ég dugleg að þræða markaði og kaupa ýmislegt smádót á þeim. Mínir nánustu vita líka að ég er mikill sankari og hafa verið duglegir að gefa mér hitt og þetta til að moða úr.“

Innt eftir því hvort efniviðurinn og smádótið taki ekki mikið pláss á heimilinu viðurkennir hún það. „Við hjónin búum í áttatíu fermetrum ásamt börnum okkar tveimur. Ég hef lagt undir mig eitt hornið í íbúðinni og ef ég næ að halda skipulagi á því þá þvælist dótið ekki mikið fyrir. Maðurinn minn er voðalega góður og skilningsríkur og hefur aldrei kvartað undan draslinu en börnin eiga það til að fara í það og skoða,“ segir hún að lokum og hlær.

Hægt er að skoða vörur Kristjönu á heimasíðu hennar mydesign.is. -sm