Landaði hlutverki í stórmynd með Keiru Knightley

Leikkonan Hera Hilmarsdóttir hefur landað hlutverki í stórmyndinni Önnu Kareninu, sem skartar þeim Jude Law og Keiru Knightley í stærstu hlutverkunum.

Þar að auki leikur Hera stórt hlutverk í sjónvarpsþáttaröðinni World Without End, sem meðal annars verður sýnd í Bretlandi, Kanada, Þýskalandi og Bandaríkjunum, en meðal leikara í henni eru Miranda Richardson, Ben Chaplin og Cynthia Nixon, best þekkt fyrir leik sinn í Sex & the City.

„Ég hef verið mikið í tökum að undanförnu, aðallega í Ungverjalandi þar sem sjónvarpsserían er tekin,“ sagði Hera þegar Fréttablaðið náði tali af henni. Hera var að ljúka námi í leiklist við hinn virta London Academy of Music and Dramatic Arts, eða LAMDA eins og hann er alla jafna kallaður, en fékk hlutverkið í sjónvarpsþáttunum skömmu fyrir útskrift. Hún flaug þess í stað beint til Ungverjalands og dvaldi þar við tökur. „Ég var á hóteli með öllum leikurunum og lærði alveg heilmikið af því,“ segir Hera hógvær.

En stóra dæmið er án nokkurs vafa hlutverkið í Önnu Kareninu. Myndin er byggð á samnefndri bók Leo Tolstoj og verður mikið búningadrama, en tökur hjá Heru byrja í nóvember. Leikstjóri myndarinnar er Joe Wright, sem hefur gert kvikmyndir á borð við Atonement og Pride & Prejudice en leikstýrði síðast Cate Blanchett og Eric Bana í Hanna. Hera leikur konu að nafni Varya, sem leikkonan segir ekki vera stórt hlutverk, hún fái þó að segja nokkrar línur. Hera hefur tekið virkan þátt í undirbúningnum og leikstjórinn Wright sækir mikið í leikhúsið í vinnu sinni; til að mynda fór allur hópurinn saman í æfingabúðir og þar voru teknir nokkrir leikir, meðal annars nafnaleikir.

„Leikstjórinn er þannig að það skiptir engu máli hversu stór stjarnan er, allir eru með.“ Sem þýddi að Jude Law og Keira Knightley voru meðal þátttakenda þótt vissulega hafi flestir þekkt nöfn þeirra. „Menn voru fljótir að gleyma nöfnum hinna í tökuliðinu,“ segir Hera og hlær.

Hera, sem verður 23 ára í desember, er komin með umboðsmann og hyggst reyna að hasla sér völl í Bretlandi. Leikkonan er nú nýflutt til Norður-Lundúna og búin að koma sér ágætlega fyrir. Hún segist þó ætla að finna sér einhverja fína íbúð eftir áramót, hún hafi bara ekki haft neinn tíma til þess. „Og svo kem ég heim um jólin.“

freyrgigja@frettabladid.is