Þrjátíu tíma þrautaganga

„Hér eru allir mjög vinalegir. Ólíkt þeim Rússum sem ég hef hitt,“ segir leikarinn Víkingur Kristjánsson í léttum dúr, en hann var staddur í borginni Norilsk í Síberíu þegar Fréttablaðið náði í hann.

Vesturport sýnir Hamskiptin í Norilsk í kvöld. Ferðalagið til borgarinnar gekk ekki þrautalaust fyrir sig og tók um þrjátíu tíma. Á meðal þeirra sem eru í ferðalaginu með Víkingi eru Selma Björnsdóttir, Elva Ósk Ólafsdóttir, Kristján Franklín og hinn sænski Mattias Lech.

Hópurinn flaug fyrst frá Keflavík til Lundúna, þaðan til Moskvu og loks til Norilsk — eða svo héldu þau. „Þar sem flugstjóri og flugþernur flugfélagsins Aeroflot tala svo hrikalega vonda ensku vissum við ekki fyrr en við vorum komin úr vélinni og inn í flughöfnina að við vorum alls ekki í Norilsk,“ segir Víkingur.

Þau voru sem sagt stödd í borginni Surgut, um þúsund kílómetrum frá áfangastað. „Aðra tilraun átti að gera að aðflugi í Norilsk þegar veður lægði,“ segir Víkingur. „Í Surgut biðum við í fjóra tíma. Þá var aftur haldið út í vél og lagt af stað. Við lentum á réttum flugvelli tveimur og hálfum tíma seinna í ekki eins fallegan bæ.“- afb