Of fullur til að ræna

Vandræðagemlingurinn Pete Doherty verður ekki ákærður fyrir rán sem átti sér stað í Þýskalandi fyrr á þessu ári. Samkvæmt lögreglunni var hann of ölvaður til að geta átt þátt í ráninu.

Forsaga málsins er sú að Doherty var staddur í Þýskalandi að leika í kvikmyndinni Confessions of a Young Contemporary. Hann braut rúðu í hljóðfæraverslun í ölæði og hefur viðurkennt það. Í kjölfarið var hljóðfærum og geisladiskum stolið úr versluninni og eigendur verslunarinnar sökuðu hann opinberlega um að eiga hlut að máli.

En heppnin er með Doherty því saksóknari málsins hefur fellt niður málið á hendur söngvaranum þar sem lögreglan segir að hann hafi verið of fullur til að stela á þessu tiltekna kvöldi.

Doherty sat nýlega inni fyrir að vera með kókaín undir höndum og hefði getað fengið allt að fimm ára dóm, hefði hann verið ákærður og sakfelldur fyrir ránið í Þýskalandi.