Baltasar Kormákur vill gera Everest-kvikmynd á Íslandi

Íslenski kvikmyndaleikstjórinn Baltasar Kormákur virðist vera kominn með annan fótinn inn í Hollywood. Honum standa til boða tvö mjög spennandi kvikmyndaverkefni en hann vonast til að geta gert annað þeirra á Íslandi.

Samkvæmt vefútgáfu bandarísku kvikmyndabiblíunnar Variety stendur Baltasar Kormáki til boða að leikstýra tveimur verkefnum í Hollywood. Annað þeirra er framhald á samstarfi hans við bandaríska stórleikarann Mark Wahlberg og hin er kvikmynd sem byggð er á sannsögulegum atburðum sem gerðust á Everest-fjalli. „Það verkefni er mjög flott og ég er mjög spenntur fyrir því. Ég er akkúrat að funda með fulltrúum frá framleiðslufyrirtækinu Working Title í London út af því núna,“ segir Baltasar Kormákur í samtali við Fréttablaðið.

Myndin segir frá því þegar tólf reyndir fjallgöngugarpar létu lífið í grennd við tind Everest. Baltasar segir það vera til skoðunar að taka stóra hluta myndarinnar hér á landi og Vatnajökull verið helst nefnt í því samhengi. „Það er auðvitað ekki hægt að gera myndina á Everest og menn eru mjög áhugasamir um að koma með hana til Íslands,“ segir Baltasar. Tökur færu jafnframt fram í Nepal, en Baltasar var ekki reiðubúinn að upplýsa hvaða leikarar kæmu til greina í aðalhlutverkin.

Hin myndin sem leikstjóranum stendur til boða að leikstýra er síðan 2 Guns, en Mark Wahlberg mun væntanlega leika aðalhlutverkið. Baltasar og Wahlberg unnu saman að gerð Contraband, en stikla þeirrar myndar sló rækilega í gegn á myndbandavefnum YouTube. Myndin er byggð á myndasögu Stevens Grant og er sögð eiga að vera hálfgerður nútímavestri í anda mynda á borð við Out of Sight og Get Shorty. „Það eru myndir sem taka sjálfar sig ekkert of hátíðlega,“ segir Baltasar, en viðræður standa yfir við aðra stóra stjörnu um að leika í myndinni. Handritið er skrifað af David O. Russell, sem var maðurinn á bak við verðlaunamyndina The Fighter.

Hlutirnir eru því augljóslega fljótir að gerast í Hollywood og Baltasar viðurkennir að þetta sé auðvitað hálfgerður draumur. „Þetta er náttúrlega eitthvað sem mann hefur lengi langað til að gera en það getur líka alltaf komið bakslag og því er mjög mikilvægt að halda fast í ræturnar, ég er því ekki að fara neitt frá Íslandi þótt þessi verkefni standi til boða.“freyrgigja@frettabladid.is