Biophilia lekið á ýmsar netsíður

Nýjustu plötu Bjarkar, Biophilia, hefur verið lekið á hinar ýmsu netsíður en platan kemur út í næstu viku.

Öllum plötum er lekið á netið áður en þær koma í verslanir en það óvenjulega við lekann á Biophilia er að platan er margmiðlunarverkefni og því fá þeir sem stela plötunni aðeins hluta af verkefninu í tölvuna sína. Með hverju keyptu eintaki af plötunni fylgir app-forrit með ýmsu aukaefni fyrir hvert lag, svo sem leikjum, ritgerðum, textum og teiknuðum kortum. Lítið er um að app-forrit leki á netið áður en þau koma út og því hlýtur upplifun þeirra sem hafa hlaðið Biophilia ólöglega niður í tölvuna sína án forritanna að vera töluvert öðruvísi en Björk hafði í huga með margmiðlunarútgáfunni.

„Björk setti sjálfa sig í framlínu tónlistarmanna með því að segja: „Við gefum út plötuna og þessi app-forrit á sama tíma og þau eru hluti af sömu sögunni," sagði Scott Snibbe, sem hannaði app-forritin fyrir Biophilia, í viðtali við breska blaðið The Guardian. „App-forritin eru tjáningarform tónlistarinnar, sögunnar og hugmyndarinnar."

Hægt er að hlusta á plötuna í heild sinni á vefsíðu bandaríska ríkisútvarpsins, npr.org, en sá aðgangur er veittur með samþykki söngkonunnar.