Bítlarnir á frumsýningu

Eftirlifandi meðlimir Bítlanna voru á meðal gesta á frumsýningu nýrrar heimildarmyndar Martins Scorsese um George Harrison. Gítarleikarinn lést árið 2001 eftir baráttu við lungnakrabbamein. „Hann var frábær maður, virkilega góður náungi,“ sagði Sir Paul McCartney, sem mætti á sýninguna ásamt Ringo Starr. Leikstjórinn Scorsese, sem var í fimm ár að gera myndina, segist lengi hafa heillast af Harrison. „Mér fannst tónlistin hans fjalla um hluti sem ég gat tengt mig við. Ég leitaði huggunar og vonar í þeim og það var sérstök lífsreynsla að hlusta á tónlistina hans.“