Á háum hælum við Kleifarvatn

„Þetta gekk ágætlega, svona miðað við veður," segir Sara Nassim, framleiðandi hjá Pegasus. Fyrirtækið var bresku stúlknasveitinni The Saturdays innan handar um helgina þegar þær tóku upp myndband við nýjasta smell sinn, My Heart Takes Over, hér á landi.

Breskir fjölmiðlar fylgja hverju fótmáli stelpnanna og vefútgáfa Daily Mail birti myndir af þeim í Heathrow-flugstöðinni þar sem þær voru nýkomnar heim eftir heimsóknina til Íslands. Þar má meðal annars sjá eina af aðalstjörnum sveitarinnar, Frankie Sandford, með Epal-poka en við hlið hennar var kærastinn, Wayne Bridge, knattspyrnumaður hjá Manchester City.

Að sögn Söru fóru tökur mestmegnis fram við Kleifarvatn og næsta umhverfi. „Þetta voru mjög erfiðar aðstæður, þær voru stílíseraðar fram á fingurgómana, klæddar í pils og háhælaða skó en stóðu sig eins og hetjur. Þær voru algjör hörkutól," segir Sara en The Saturdays gafst ekki mikill tími til að skoða sig um enda var unnið frá morgni til kvölds. „Þær höfðu engan tíma til að kíkja eitthvað út."

The Saturdays er spáð miklum frama og í gær greindu breskir fjölmiðlar frá því að sveitin hefði samið við bandarísku sjónvarpsstöðina E! um gerð raunveruleikaþáttar og er talið að sá samningur eigi eftir að greiða götu sveitarinnar að Bandaríkjamarkaði sem hefur reynst mörgum torsóttur. - fgg