Gerir maska úr geri

Arndís Sigurðardóttir, nemandi á frumgreinadeild í Háskólanum á Bifröst, gefur út sína fyrstu bók í nóvember. Bókin hefur hlotið titilinn Náttúruleg fegurð og inniheldur uppskriftir að ýmsum náttúrulegum húðkremum, möskum og hárvörum.

Arndís segist lengi hafa haft áhuga á náttúrulegum snyrtivörum og lífrænu mataræði og hóf í kjölfarið að prófa sig áfram með uppskriftir að eigin kremum og hárvörum. „Um tíma velti ég því fyrir mér að hefja framleiðslu á náttúrulegum snyrtivörum en fannst skemmtilegri hugmynd að gefa út bók með ýmsum uppskriftum sem ég hafði þróað í gegnum tíðina,“ segir Arndís sem viðurkennir jafnframt að árangurinn hafi verið misjafn, sumar uppskriftirnar heppnuðust vel á meðan aðrar heppnuðust verr.

„Einu sinni gerði ég hárnæringu sem innihélt mæjónes og það gekk ekki vel, hárið varð stíft og leiðinlegt. En fólk þarf ekki að hafa áhyggjur, allar uppskriftirnar í bókinni hafa verið prófaðar á mér og öðrum með góðum árangri.“

Bókin inniheldur ekki aðeins uppskriftir að snyrtivörum heldur einnig fróðleiksmola um hráefnin og leiðbeiningar um hvaða hráefni henti hverri húðtýpu. Innt eftir því hvaða uppskrift sé í uppáhaldi hjá henni er Arndís ekki lengi til svars: „Uppáhaldsmaskinn minn er germaski sem er mjög góður fyrir feita og bólótta húð. Ég er alveg hætt að kaupa mér húðvörur og hvers kyns krem, nú bý ég þetta til sjálf úr hráefni sem ég á til heima í eldhúsi. Kosturinn við það er að þú veist nákvæmlega hvaða efni varan inniheldur og hún er að auki mun ódýrari.“

Arndís segir að hjólin hafi fyrst farið að snúast eftir að hún fann útgefanda og viðurkennir að hún sé mjög spennt að sjá bókina tilbúna.

„Bókin er svo fallega myndskreytt og ég hlakka mikið til að sjá hana tilbúna. Þetta verður ein af bókunum sem taka þátt í jólabókaflóðinu í ár og ég er til í slaginn,“ segir hún glaðlega að lokum. -sm