Fylgihlutalína úr roði og kristöllum

Sigrún Lilja Guðjónsdóttir, sem hannar skó og fylgihluti undir heitinu Gyðja Collection, hefur sent frá sér nýja línu sem er meðal annars unnin úr íslensku laxaroði og Swarovski-kristöllum.

Sigrún Lilja segir skemmtilegt að vinna með fiskroð enda sé efnið bæði sterkt og meðfærilegt.

„Það er gaman að vinna með þetta hráefni því áferðin og litirnir eru svo skemmtileg. Tískumerki á borð við Prada, Dior, Ferragamo og Nike hafa einnig verið að nota þetta hráefni í sína hönnun."

Sigrún Lilja var í fyrra fengin til að hanna brúðarskó leikkonunnar Anítu Briem og eru þeir úr laxaroði og skreyttir með Swarovski-kristöllum. Skórnir þóttu svo vel heppnaðir að í kjölfarið var ákveðið að setja þá í almenna sölu og bera þeir heitið Aníta, í höfuðið á leikkonunni.

„Ég ákvað svo að framleiða líka aðra skó til heiðurs Anítu og eru þeir silfraðir að lit og þaktir kristöllum allan hringinn. Þeir skór eru aðeins til í takmörkuðu upplagi og heita Aníta Crystal."

Sigrún Lilja er ekki fyrsti hönnuðurinn sem nefnir vöru í höfuðið á leikkonu því tískuhúsið Hermès nefndi hina heimsþekktu Birkin-tösku í höfuðið á Jane Birkin. Innt eftir því hvort hún spái Anítu skónum sama langlífi og Birkin-töskunni verður Sigrún Lilja hugsi.

„Skórnir eru þannig í sniðinu að þeir gætu auðveldlega orðið klassík og maður vonast vissulega til þess. Hugmyndin var að þeir verði mjög langlífir og að við getum svo haldið áfram að bæta við litum inn á milli. Þeir hafa í það minnsta fallið vel í kramið hjá viðskiptavinunum," segir hún að lokum.

Vörurnar fást í Debenhams í Smáralind og Duty Free Fashion í Leifsstöð. -sm