Kasólétt í ræðustól á bókamessunni í Frankfurt

„Ég á að eiga seint í nóvember en það er ekkert að mér, ég er mjög lipur og fer allra minna ferða sjálf. Ég hef ekkert tekið þann pólinn í hæðina að leggjast með tærnar upp í loft heldur hef ég bara verið mjög vinnufær síðustu daga,“ segir rithöfundurinn Guðrún Eva Mínervudóttir.

Guðrún hefur í næg horn að líta. Fyrir það fyrsta á hún von á sínu fyrsta barni með handritshöfundinum og kvikmyndagerðarmanninum Marteini Þórssyni. Þá kemur bókin Allt með kossi vekur út fyrir þessi jól og svo flytur hún eina af opnunarræðum bókamessunnar í Frankfurt sem verður sett með formlegum hætti þann 11. október. Þar að auki var bókin hennar Skaparinn að koma út í Þýskalandi. „Ég hef verið að fá mjög jákvæð viðbrögð og forlagið mitt þarna úti stendur sig mjög vel. Þeir buðu mér og Marteini meðal annars til Berlínar í kynningarferð fyrir nokkrum vikum, Marteinn fékk að koma með af því að ég var ólétt.“

Guðrún Eva er hvergi bangin við opnunarræðuna en kveðst þó ætla að undirbúa sig vel og vera með hana skrifaða, hún sé ekki eins og pólitíkusarnir. Hún verður hins vegar ekki eini rithöfundurinn sem flytur ræðu því metsöluhöfundurinn sjálfur, Arnaldur Indriðason, verður einnig meðal ræðumanna. „Við Arnaldur eigum að koma á eftir öllum formlegheitunum og reyna að vera skemmtileg,“ segir Guðrún.

Allt með kossi vekur er sjötta bók Guðrúnar en sú fyrsta sem hún skrifar með barn undir belti. Guðrún Eva segir það síður en svo hafa komið að sök. „Ætli það hafi ekki bara hjálpað til. Ég hef aldrei verið skýrari í kollinum og ég fór létt með tíu tíma vinnudag í nokkurn tíma því þetta var mikil törn undir lokin. Svo sakaði ekki að Marteinn stjanaði við mig og sá til þess að mig skorti aldrei neitt.“ Hún bætir því við að bókin sé á svipuðum slóðum og í Skaparanum. „Fólk getur örugglega rifist um það hvort þetta sé fantasía eða raunveruleiki.“

freyrgigja@frettabladid.is