Draugabanar 3 bíður eftir Bill

Undanfarna mánuði hefur allt logað í fréttum þess efnis að ráðist verði í gerð þriðju myndarinnar um draugabanana vinsælu. En nú hefur Sigourney Weaver tekið af allan vafa um að ef Bill Murray segi nei við handritinu og hlutverki í myndinni þá verði ekkert af þriðju myndinni. Allir hinir leikararnir eru reiðubúnir til að kljást við drauga á ný en nú er þess beðið að Murray lesi handritið og kveði upp sinn dóm.

„Ég hef ekkert heyrt frá honum og það þýðir sennilega að hann hafi ekki enn lesið handritið," er haft eftir Weaver í bandarískum fjölmiðlum. „Ef hann segir nei þá gerum við ekki myndina. Hugmyndin er að fá allan hópinn saman á ný."

Murray er annálaður sérvitringur og er frægt þegar hann mætti fremur óvænt á tökustað Lost in Translation til að leika í myndinni. Leikstjórinn Sofia Coppola hafði þá ekki heyrt frá honum í nokkra mánuði.

„Mér dytti ekki í hug að hringja í hann. Maður skilur bara eftir skilaboð og ef hann svarar ekki þá hefur hann engan áhuga. Þetta er mjög gott kerfi, enginn tölvupóstur, engin símtöl, engir umboðsmenn. Ég veit hins vegar ekki hvernig hann fer að þessu," segir Weaver.