Vonandi var ég ekki rekinn

Kele Okereke, söngvari og annar gítarleikara bresku rokkhljómsveitarinnar Bloc Party, er óviss um framtíð sína í hljómsveitinni.

Hann segir í viðtali við tónlistartímaritið NME að hann hafi séð meðlimi hljómsveitarinnar fyrir utan hljóðver í New York á dögunum, en hann hafi ekki verið látinn vita og hann óttist að þeir hafi farið á bak við hann.

„Ég var að borða hádegismat í New York fyrir svona þremur vikum,“ sagði Okereke í viðtali við NME. „Svo sá ég einhvern ganga fram hjá og ég þekkti klippinguna. Þetta var Russell [hinn gítarleikari Bloc Party]. Ég kallaði á eftir honum en hann heyrði ekki í mér. Ég elti hann og sá hann svo hitta hina í hljómsveitinni fyrir utan æfingahljóðver. Þeir fóru allir inn saman.“

Okereke sagðist ekki vita hvað væri í gangi. „Ég vona að ég hafi ekki verið rekinn. Við höfum ekki talað saman lengi og ég þori ekki að spyrja þá.“

Þessar fréttir berast stuttu eftir að tilkynnt var að hljómsveitin myndi koma saman á ný í september. Það er því óvíst í hvers konar mynd það verður.