Kalli Berndsen leitar að konum

„Ég er að leita að öllum konum sem eru til í að sjá sjálfar sig í nýju ljósi,“ segir Karl Berndsen, en hann er þessa daga að undirbúa tökur á nýjum þætti. Þátturinn, sem fer í loftið á Stöð 2 í byrjun árs og hefur ekki enn fengið nafn, verður lífsstílsþáttur þar sem Karl gefur konum ráðleggingar varðandi útlitið.

Karl lofar flottum þætti en búið er að sérsmíða stúdíó fyrir hann þar sem allar tökur fara fram. Hann segist ætla að taka bæði áhorfendur og konurnar sem til hans koma „hálfa leið til Hollywood“ í þáttunum. „Þetta er rándýrt og allt öðruvísi en það sem ég hef verið að gera. Ég er mjög spenntur yfir að hefjast handa,“ segir Karl og bætir við að hann sé kominn til að vera á sjónvarpsskjánum.

„Það er ekki auðvelt og mér líður ekki alltaf vel í sjónvarpi því þetta er mikil vinna og ábyrgð sem fylgir þessu. Ekki bara varalitur og háir hælar. Það er mér samt mikið metnaðarmál að gera konur glæsilegar svo ég læt mig hafa það því ég fæ svo mikið til baka.“

Karl hvetur sem flestar konur til að skrá sig til leiks og segist sjálfur hafa reynslu af því að flestar íslenskar konur fari í svona verkefni með opinn huga og treysti honum. „Ég lýsi bara eftir ósköp venjulegum konum sem vilja fá ráðgjöf um útlit og annað. Ég vil einnig taka það fram að vaxtarlag er algert aukaatriði í mínum huga. Mér finnst allur vöxtur flottur og get unnið með allt,“ segir Karl en skráning í þáttinn hefst í dag á vefsíðunni stod2.is. - áp